Муҳтарама Ферузахон. Бизга мактуб йўллаганингиз учун ташаккур. Сизга ўхшаган мўмина-муслима ва мухлиса қизларимиз фахримиздир. Сизнинг ҳолатингизда мазкур икки намозни, сув тайёрлаш имкони йўқ бўлгани учун жоиз. Иложи борича рўмол ўрашга ҳаракат қилинг. Осон услубини, иложи бўлса кийиб оладиганини топилса яхши бўлар эди. Аёлларга хос шим кийсангиз бўлади.

Ўзингизга етган беморликка сабр қилинг. Аллоҳнинг меҳри дея қабул айланг. Савоби кўп бўлади. Уламоларимиз бу борада алоҳида боблар очиб, ҳадисларни келтирганлар:

БЕМОРЛИКНИНГ ФАЗЛИ ВА УНГА САБР ҚИЛИШ ҲАҚИДА

Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам: «Мусулмонга қай бир мусибат; ҳорғинликми, беморликми, ташвишми, маҳзунликми, озорми, ғам-ғуссами, ҳаттоки тикон киришми етадиган бўлса, албатта, Аллоҳ улар ила унинг хатоларини каффарот қилур», дедилар». Икки Шайх ривоят қилишган.
Энг аввал таъкидлаб қўйишимиз лозимки, ушбу сарлавҳа остида келадиган ҳадиси шарифлар мусулмонлар амал қилишлари лозим бўлган диний кўрсатмалар жумласига киради. Бу ерда шахсий тажриба ёки шунга ўхшаш нарсалар йўқ.
«Тиб китоби»нинг бошида беморликка сабр қилиш лозимлиги ҳақидаги ҳадиси шарифларни келтириш ила бу масалада энг аввало сабр лозимлиги таъкидланмоқда. Ҳар қандай беморлик ориз бўлганда бемор учун энг зарур бўлган нарсалардан бири сабр ҳисобланади. Агар сабрсизлик қилинса, дардга дард қўшилади, шифо топиш кечикади ва яна бошқа ноқулайликлар ҳам келиб чиқади.
Шунинг учун Исломда бу масалага алоҳида эътибор берилган. Пайғамбаримиз соллаллоҳу алайҳи васаллам ўзларининг ушбу ҳадиси шарифларида инсонга етадиган бир неча мусибатлар ичида беморликни ҳам номлаб туриб, ана ўша мусибатларига сабр қилган мусулмоннинг хатоларини Аллоҳ таоло кечиб юбориши таъкидламоқдалар. Албатта, бу борадаги кечиб юбориладиган хатолар, Аллоҳ таоло билан банданинг орасидаги муомалаларда банда томонидан содир кичик гуноҳлардир.
Демак, мусулмон инсон каттаю кичик барча мусибатларга, оғир беморликларга ҳам, тикон киришига ҳам сабр қилмоғи лозим экан
Яна ўша кишидан ривоят қилинади: «Набий соллаллоҳу алайҳи васаллам: «Аллоҳ кимга яхшиликни ирода қилса, уни синовга учратур», дедилар».
Ана ўшандоқ синовларнинг кўпроқ учрайдиганларидан бири беморликдир. Демак, беморликка мубтало бўлган мусулмон инсон ўзига ориз бўлган хасталикни Аллоҳ таоло томонидан ўзига нисбатан бўлаётган синов деб билмоғи лозим ва сабр қилиб, Аллоҳ таолонинг Ўзидан шифо сўрашга ўтиши керак. Мўмин-мусулмон одам ўзига беморлик етганда сабрсизлик қилиш ўрнига, сабр қилиб, хасталикни Аллоҳ таоло томонидан ўзига бериладиган яхшиликдан олдинги синов деб билмоғи лозим. Агар ўша синовдан яхши ўтса, унга яхшилик ато қилинади. Мабодо, Аллоҳ кўрсатмасин, синовдан ўта олмаса, ўзидан кўрсин.
Беморликларга сабр қилган мўмин-мусулмон бандага бир неча хил мукофотлар ваъда қилинмоқда.

1. Гуноҳларнинг ювилиши.
2. Даражаларнинг кўтарилиши.
3. Хатоларнинг ўчирилиши.
4. Аллоҳ томонидан яхшилик ирода қилиниши.
5. Дарднинг оғирлигига қараб ажрнинг кўпайиб бориши.
6. Дард чекиб, сабр қилиб тузалган одам осмондан янги тушган дўл донаси каби гуноҳлардан пок бўлиши.
7. Тортилган дард охират азоби ўрнига ўтиши.
8. Оғир дардга сабр қилишлик бандани жаннатга киришига сабаб ҳам бўлиши.

Мўмин банданинг жаннатга киришига сабаб бўладиган нарса тутқаноқ ва икки кўз ожизлиги каби тузалишидан умид йўқ хасталикларга сабр қилмоқ эканлиги.
Имконият даражасида динимизни ўрганиб ва унга амал қилиб бораётганингиз учун ташаккур. Аллоҳ ибодатларингизни қабул айласин!
Биз сизга қўлимиздан келган ёрдамни тақдим қилишга тайёрмиз. Бемалол сўрайверинг.

Абу Муслим! Ферузхонга имкон даражасида бор нарсалардан юбориб турилсин! Имкони бўлса, одам топиб китоблардан ҳам юборилсин!